Хамтран амьдрагч нь сална гэсний улмаас хэрцгийгээр хөнөөжээ

28 настай эрэгтэй Д архидан согтуурсан үедээ шөнийн 23.00 цагийн орчимд Баянзүрх дүүрэгт түрээслэн амьдардаг нийтийн байрандаа нэг хүнийг хөнөөж, нөгөөг нь архины шилээр толгой хэсэгт нь хэдэнтээ цохиж хөнөөхийг завджээ.

Хэрэг үйлдэх болсон шалтгаан нь хамтран амьдрагч нь өөрөөс нь салахаар болсны улмаас түүнийг “алж чадна” гэдгээ нотлон харуулахын хэрцгийгээр дайрч, мөн дэргэд байсан найзынх нь биед халджээ.

Түүнийг хүнийг алах, хүний эрүүл мэндэд хохирол учруулсан болохыг шүүх шинжилгээний дүгнэлт болоод гэрч, мөрдлөгөөр нотлоод буй.

Иймд шүүхээс “Эрүүгийн хуулийн ерөнхий ангийн 2.8 дугаар зүйлийн 1 дэх хэсэгт заасныг журамлан тусгай ангийн 10.1 дүгээр зүйлийн 2.1 дэх заалтад зааснаар “хүнийг онц харгис хэрцгийгээр алахаар завдсан”, Эрүүгийн хуулийн ерөнхий ангийн 2.2 дугаар зүйлийн 3 дахь хэсэгт заасныг журамлан тусгай ангийн 10.1 дүгээр зүйлийн 2.1 дэх заалтад зааснаар “онц харгис хэрцгийгээр хүнийг алсан” гэмт хэрэг үйлдсэн гэм буруутайд тус тус тооцож 20 жилийн хорих ялыг хаалттай хорих ангид эдлүүлэхээр болсон байна.

Холбогдох хуулийн заалт: Эрүүгийн хуулийн 10.1 дүгээр зүйл. Хүнийг алах

1.Хүнийг алсан бол найман жилээс арван таван жил хүртэл хугацаагаар хорих ял шийтгэнэ.

2.Хүнийг:

2.1.онц харгис хэрцгийгээр;
2.2.олон хүний амь бие, эрүүл мэнд, эд хөрөнгөд хохирол учруулж болох аргаар;
2.3.захиалгаар;
2.4.өөр гэмт хэргийг нуун далдлах, хялбарчлах зорилгоор;
2.5.өөртөө, бусдад эдийн, эдийн бус ашигтай байдал бий болгох зорилгоор;
2.6.хоёр, түүнээс олон хүнийг;
2.7.хохирогчийн биеэ хамгаалж чадахгүй, жирэмсэн болохыг мэдсээр байж;
2.8.гэр бүлийн хүчирхийлэл үйлдэж;
2.9.эрхэлж байгаа ажил, албан үүрэгтэй нь холбогдуулж өөрийг нь, түүний ойр дотны хүнийг;
2.10.зохион байгуулалттай гэмт бүлгийн гишүүн зохион байгуулалттай гэмт үйл ажиллагааныхаа явцад;
2.11.бүлэглэж;
2.12.эрүүдэн шүүж;
2.13.цус, эд, эрхтнийг авах зорилгоор;
2.14.үзэл бодол, арьсны өнгө, үндэс, угсаа, шашин шүтлэг, бэлгийн, хүйсийн чиг баримжаагаар нь үзэн ядаж алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.